《成功的反思》係Micheal Sandel 嘅新作，如果你對當代嘅政治哲學感到興趣，我十分建議你去youtube睇佢嘅公開課：
https://www.youtube.com/watch?v=sHHa4ETr2jE
因為，佢基本上就係當代最有名同最具影響力嘅政治哲學家，因為rawls（另一個哲學家）對現代政治哲學影響非常大，而Micheal Sandel 作為一個研究Rawls嘅學者，佢嘅思想就係想去推進rawls，甚至佢自己都成為一個主流，叫做社群主義。喺開始討論本書之前，想補充一下背景。
西方嘅政治思想嘅發展大概係咁：
Plato（精英主義：統治者＝哲學家，所以政治就係對一部份人嘅全面教育，包括藝術、體育，當精英得以統治，就會以佢嘅智慧使到平民可以按照佢嘅天性為城邦服務，平民之間和諧共處）
﹣＞
Aristotle（公民社會：提出人天生係政治動物，而政治嘅作用嘅作用就係要做人民得到幸福）
〔古希臘哲學家其實都唔推崇民主政制，民主可以話係一個現代產物〕
﹣〉
〔希臘文明消亡，基督教抬頭〕
基督教神學家（論述政教合一嘅合理）
﹣＞
Thomas Hobbes（提出人喺自然狀態（state of nature）會自相殘殺，所以需要權威（政府）管治）
﹣＞
〔基督教權威被懷疑，民主興起〕
啟蒙運動：
Rousseau（人性本善，政府嘅存在只係不停壓逼人民）
+
Adam Smith（為自由主義同資本主義奠基）
﹣＞
〔推翻貴族政治eg 法國大革命﹣＞資本主義＋全球殖民令一部分國家嘅一部分人富有﹣＞累積財富﹣＞資本家誕生﹣＞太多錢所以有錢去起工廠再賺更多錢﹣＞資本家同工人階級誕生〕
﹣＞
Marx（為共產主義奠基，提出工人被異化，而只有資本家落台，工人先有可能幸福）
﹣＞
John Rawls（提出無知之幕嘅思想實驗：假設你未出生，而你唔知出生後你嘅條件會係點，eg叻唔叻、靚唔靚、有無錢⋯⋯，你會選擇一個咩社會出世呢？往往，人都想選擇一個公正嘅社會出生，所以，如何成為一個公正的社會就變成一大問題）
〔二戰後，法西斯消亡，資本主義同共產主義分庭抗禮，蘇聯敗亡，共產主義被視為妖魔，資本主義發現共產主義好容易組織工人反抗，所以決定放下身段，將部分共產主義思想融入資本主義當中，福利國家／高稅基國家出現，開始保障工人，嘗試建立一個公正社會〕
﹣＞
〔民粹再次主義興起？〕
Machael Sandel（研究John Rawls嘅學者，覺得John Rawls諗得唔夠，公正係要，但社會唔單止要公正，一個社會需要人民成為集體嘅一部份，只有當人民生活喺集體之中，佢先可能幸福（可以見到有古希臘嘅影子，所以西方政治哲學繞咗二千年，終於去返討論點樣令人民幸福））
由政治哲學嘅發展進程可以見到，有兩個大問題要解決，一係基於民粹越嚟越常見，民主到底可唔可行？二係如果可行，咁民主要做咩先可以令自己更好？如果唔可行，咁應該轉做咩？
Machael Sandel仍然相信民主，只係民主唔係仙丹，改變制度令到社會更公平亦唔保證社會會變得美好，所以Machael Sandel用自己對美國嘅認識去寫咗呢本書，解釋點解John Rawls嘅夢想仍然未能夠實現，但好老實咁講，呢本書對我嚟講唔算係一本好哲學嘅書，因為佢行文更似係一本社會學嘅書，就算再加上同香港情況唔相似，仍然無阻佢係一本值得睇嘅書，只係內容重複嘅地方唔少。
喺開始之前，我想講一講書名，英文書名：The Tyranny of Merit，Merit 對應住 Meritocracy，呢本書將meritocracy 譯做才德主義，而才德主義當中嘅德字好似有道德意涵嘅意思，但meritocracy 呢個term 出名嘅在於Michael Young喺1958 寫過一本叫The Rise of the Meritocracy嘅小說講工人頂唔順merit，從而用暴力革命推翻merit 嘅階級，試想像如果一個人又有才能又有德行，我睇唔出有咩人會想用暴力革命去反對呢種有才有德嘅人。所以我傾向於用「才知主義」去譯meritocracy（我唔選擇用「精英主義」係因為精英可能有褒義，但meritocracy 應該係中性，因為merit嘅本義只係話值得獲得回報／具有功績），對應住社會就係讀書好叻、搵到份高薪厚職嘅人，我稱之為才知者。當然，如果我係譯者，我就會用「精英的暴政」去譯書名，因為精英通俗易明，亦吸引人睇，但呢度，我只想如實按照自己理解去陳述。
(後註：得到網友提醒，德可以係中性，但我為去除道德意味嘅誤會，維持使用才知主義。）
話雖如此，我始終唔明白點解要譯成成功的反思。本書當然有想反思咩係成功，但最重要嘅係，Machael Sandel發現依家社會出現兩種人嘅對立，唔再係資本家同工人、唔再係富人同窮人、而係才知者同非才知者嘅對立，而呢種對立所帶嚟嘅後果甚至比富人同窮人更嚴峻，所以佢係想批判才知者所帶嚟嘅暴政，不過，可能呢點應該係基於譯者同我理解唔同。
希望講完呢本書，我可以解決到：
1）喺咩情況下，民主會有問題？
2）喺咩情況下，平等會有問題？
3）喺咩情況下，可以善用民主同平等令社會變得更好？
(本文將採用第一身角度書寫）
（下頁續，此頁內容對應Podcast Ep.4)
牛哥講經 
牛哥講經好正，聽完podcast覺得好正，講得好好，完全唔怕悶，好清晰，完本我睇呢本書都有啲吃力，但聽完之後就搞清楚咗好多，其實幫咗我好多，希望之後都可以keep住做落去，加油💪🏻
讚Liked by 2 人
感激你願意閱讀/收聽，能夠幫忙到你去了解一啲唔易嘅書籍，實在感到興奮!
會努力製作落去!
讚讚