引子一
講完胡適嘅墨子同老子，今集我哋終於要講講胡適口中嘅孔子。
胡適對孔子嘅理解主要係以字詞嘅考據出發，去對應當時嘅時代，例如佢對仁字嘅理解就同宋儒唔同。而更特別嘅地方，係胡適嘗試用《易傳》、《春秋》、《論語》一齊去詮釋孔子。《易傳》透露住孔子嘅哲學基礎，禮制原來係由觀察自然而嚟，非常貼地，而呢個自然係源自於天嘅模範；《春秋》顯示孔子嘅正名主義嘅野心，直認以主觀評斷書寫（改寫）歷史，用歷史去對過去人物或譽或毀，達至賞善罰惡嘅果效，建立歷史嘅模範；《論語》之下，教導一個君子點樣成為一個人格上嘅模範，再因此而以正名去達到管治社會嘅結果，孔子就係想喺亂世當中，重新建立模範，因為周禮嘅原意，就係要以周禮作為模範去指引人去達至理想，甚至我哋可以話，孔子呢一套係模範嘅哲學，去講天嘅模範係人所可以模仿、建立歷史嘅模範、人嘅模範（君子）。用圖表理解就係：
《易傳》：以天作為模範，給予禮制基礎－＞《春秋》：以《春秋》展現模範，重建周禮威嚴－〉《論語》以君子作為模範，重新定義君子為通過禮教培養嘅人格目標
只係胡適喺行文之中無將呢個層層遞進嘅進路明顯咁點出，我希望用兩到三集嘅時間去一步步梳理《易傳》、《春秋》、《論語》之間嘅關係。
喺胡適嘅詮釋之下，孔子重點唔在於建立一個形上系統，就算《易傳》建立一個以天作為模範嘅系統，都係為咗以此從歷史同現實之中去建立一個有內涵嘅模範，去回應只係得返軀殼而失去靈魂嘅周禮，嘗試為呢隻由公元前一千一百年已經開始出現而漸漸衰敗嘅巨獸，去重新灌注一個重視每一個個體嘅精神。今集會分成上下兩部分，上半部分主要會簡介《易經》系統，內容包括：
- 胡適話知識份子主要有三種，極端破壞派、極端厭世派同積極救世派，孔子屬於邊種？
- 《易經》原來唔係一本占卜書？
- 孔子晚年編定《六經》，當中《詩》、《書》、《易》各自象徵古代嘅文、史、哲，咁《易》經嘅哲學成份係點理解？
- 用胡適嘅河流比喻解釋《易經》嘅三易，即係變易、簡易、不易嘅意思
- 解釋孔子要提出講模範嘅原因
下半部分會由《易傳》入手，去講講胡適以《易經》嘅象同辭建立禮儀法度，內容包括：
- 卦象原來係古人觀察嘅總結同埋想像力、創新嘅協助，胡適話「這個根本學說是人類種種的器物制度都起於種種的「意象」。」
- 胡適以考據分出現象、意象、法象三個概念，我話胡適係用西方柏拉圖嘅思想去解《易經》
- 《易經》當中嘅辭，原來係聖人所寫嘅道德判斷
- 我會喺結語指出胡適講法嘅錯處
一齊用一個新視角去讀《易經》，或者你會驚訝古人嘅想像力，不過無想像力又點能夠由無到有咁發明電腦、網絡呢？你話係唔係啊，蘇菲？啊唔係，應該係朋友先啱。
正文
第一部分：簡介《易經》系統
孔子遇隱
孟子記述孔子嘅年代係「世衰道微，邪說暴行有作，臣弒其君者有之，子弒其父者有之。孔子懼，作《春秋》。」人人都話自己有仁義但做暴行，臣殺君主、兒子殺父，面對一個咁混亂嘅時代，胡適指出知識份子喺春秋時期主要有三種方法應對。
- 極端破壞派：老子，將禮制去除，大國無為而治，小國寡民。
- 極端厭世派：孔子提到「賢者辟世，其次辟地，其次辟色，其次辟言。」《論語・憲問三十七》，即係當時嘅賢者會避世、避開多事之地、避開華麗嘅場合、避開是非之地，就同莊子所講嘅禮制好似一個網，然後賢者會好似雀仔飛走、老鼠掘地一樣，賢者會離開社會。
- 積極救世派：就係孔子。喺《論語・微子》當中多次提及孔子／孔子嘅學生遇到隱士嘅情況，都相當有趣，我只舉一例。
話說有次子路幫孔子去問路，遇到一個叫做桀溺嘅隱士（再次提提大家，古人話問路，其實都係借問路去講第啲嘢，呢一次嘅情況應該係問緊啲隱士嘅志向）。桀溺話：「滔滔者天下皆是也，而誰以易之？且而與其從辟人之士也，豈若從辟世之士哉？」意思係，依家天下嘅罪人好似滔滔江水咁多，有邊個可以改變呢種情況？你與其跟住個會避開人嘅人（佢意思係孔子，呢度好有趣，孔子周遊列國，又點會避開人？所以桀溺嘅意思可能係隱士喺亂世當中先係人，而孔子成日去遊說君主，就自然會避開啲隱士，避開隱士嘅人），你不如同我一齊避世啦。
子路同孔子講返呢件事，孔子就話：「鳥獸不可與同群，吾非斯人之徒與而誰與？天下有道，丘不與易也。」意思係，正如人同鳥獸唔可以一齊生活（暗示同鳥獸一齊生活嘅隱士唔係人？），我唔同人打交道咁仲同邊個打交道？如果天下係有道嘅，我就唔使出嚟提出改革啦。可見孔子係深明天下無道，但仍然想喺同人打交道嘅過程中，去改善禮制，而唔願意避世。
我覺得子路直白嘅性格，更能表露出儒家嘅人喺當時點解仲要漇足到官場嘅混水當中。佢話：「不仕無義（唔做官又點做到義呢？）。長幼之節，不可廢也；君臣之義，如之何其廢之？（長幼、君臣都係正確嘅道理，點能夠廢除呢？）欲潔其身，而亂大倫（想潔身自愛而遠離官場，就會眼見倫理日漸喪亡）。君子之仕也，行其義也（君子去做官，只係為咗行義）。道之不行，已知之矣（道嘅失去，一早已經知道）。」
我哋可以見到，做官係其中一個儒家回應亂世嘅方針。但其實呢一個方針只係一時，目的係為咗行義、修正禮制。而真正令到儒家流傳萬世嘅，唔係因為孔子做實務嘅官去為國家制定政策，春秋戰國當中，文人治國可謂恆河沙數，但都無被人記住。令孔子從諸子之中脫穎而出嘅，係孔子喺離開楚國之後，以68歲嘅高齡返到魯國做史官，去刪減、編訂《六經》。甚至我哋可以話，孔子早年去周遊列國、做實務嘅官都只能醫治禮制表面嘅問題，《六經》先係晚年嘅孔子對禮制所作出嘅根本變革，但我哋依家往往只留意到孔子嘅《論語》，而唔了解《六經》，咁就唔容易明白孔子喺當時嘅威力。
牟宗三喺《中國哲學十九講》當中指出，老子之所以要反對周禮，就係因為老子認為當時嘅周禮只有外在嘅形式，一個人即使行出周禮，但佢根本無周禮嘅精神。可能一個人表面行出對父親恭敬嘅禮，但內心密謀去殺死父親然後取代佢嘅位置。而孔子要做嘅，就係要重建周禮嘅內在價值。如果咁講嘅話，老子反周禮嘅學說對當時嚟講就係一個激進嘅學說，後嚟激發法家以法去除周禮嘅結果，而孔子改革周禮，就顯然溫和得多。
對於孔子，胡適由其重視《六經》當中嘅《易（經）》同《春秋》，佢唔以占卜鬼神嘅角度去理解《易經》，而係以孔子所詮釋嘅《易經》，解釋禮節嘅根源同作用，而《春秋》唔係一本簡單嘅歷史書，而係承接《易經》思想，去闡述孔子嘅正名思想。我哋先睇睇胡適點理解《易經》。
易經流傳
胡適指出，孔子面對住「世衰道微，邪說暴行有作」嘅時代，想將無道嘅世界轉化成有道，佢就喺《易經》當中去得出咗心得，例如由坤卦當中嘅「履霜、堅冰至」去對應回應亂世嘅態度：
「臣弒其君，子弒其父，非一朝一夕之故，其所由來者漸矣，由辯之不早辯也。《易》曰「履霜、堅冰至」，蓋言順也。」《易・文言・坤》
冰封三尺，非一日之寒，臣殺君、子殺父嘅風氣唔係一時發生，而係積累已久。坤卦嘅初六所寫到嘅「履霜、堅冰至」，即係當人腳踏雪地，知道冰即將變得堅硬，面對堅硬嘅冰，就唔可以妄想好快可以清除堅冰，所以改革唔能夠急，而要夠深入。睇睇胡適自己點講：
「社會國家的變化，都不是「一朝一夕之故」，都是漸漸變成的。如今要改良社會國家，不是「頭痛醫頭，腳痛醫腳」的工夫所能辦到的。必須從根本下手。孔子學說的一切根本，依我看來，都在一部《易經》。我且先講《易經》的哲學。」（本書，頁78）
以《易經》開始去講孔子嘅哲學，可謂胡適獨特嘅見解。一齊睇下呢本占卜書嘅哲學成份。
伏羲文王
我哋喺ep. 45補充過文王用《易經》將商朝嘅宗教人格神轉化成周朝嘅具道德意識嘅人格神，而孔子做嘅嘢，就係透過補充《易經》以外再加個《十翼》（又稱《易傳》，即係《彖》上下、《象》上下、《文言》、《繫辭》上下、《説卦》、《序卦》、《雜卦》）（有啲人話《十翼》唔係全部都係孔子所寫，呢點係可能，但《十翼》主要展現儒家思想，呢點就比較多人支持）見到個加字，即係原本嘅《易經》係無《易傳》。
其實《易經》並唔係一個作者就完成嘅作品。相傳，第一個畫出《易經》嘅係伏羲，佢同女蝸係一對，然後生出咗人。呢點就難以確信，總之傳說中伏羲所畫嘅叫先天八卦，而後嚟文王所畫嘅八卦，就叫後天八卦，主要分別，在於次序唔同。另外一個唔同就係有卦辭爻辭，據講係文王寫卦辭（即係解釋每一個卦嘅吉凶）、周公寫爻辭（即係解釋每一個爻嘅吉凶），但其實唔確定爻辭到底係文王定係周公寫，只係時代相差唔遠，所以大約可以理解為文王時期嘅《易經》，我哋暫稱住文王《易經》先。文王《易經》就係有後天八卦，加上卦辭爻辭，當中嘅卦辭爻辭已經有少量道德意味。文王《易經》範圍細啲，而孔子所編嘅《易經》範圍大啲，包埋《十翼》，我哋暫稱住孔子《易經》先，下文如果無指名嘅話，《易經》就係指文王《易經》。
孔子將孔子《易經》同仁義禮作出一個緊密嘅連繫，胡適針對嘅，係喺孔子《易經》對禮嘅系統嘅建立，而非著眼喺術數，更稱術數係謬說：
「我以為從前一切河圖、洛書、讖緯術數、先天太極……種種議論，都是謬說。」（本書，頁78）
佢認為孔子《易經》就只有三個基本概念。
- 易
- 象
- 辭
先講易字。胡適認為易字就係變易嘅意思，佢舉出孔子感嘆：「逝者如斯夫！不舍晝夜。」用河流嘅流變解釋變化。「『逝者』便是過去種種。天地萬物，都像這滔滔的河水，才到了現在，便早又成了過去，這便是『易』字的意義。」（本書，頁79）而《易經》就係描寫事物嘅變化過程。變化過程大概就係：
「易有太極，是生兩儀，兩儀生四象，四象生八卦。」《易・繫辭上》
由於佢好似當人本來已經識《易經》咁解得好快，我就先簡單補充一下《易經》嘅系統。
陰陽八卦
先講講《易經》嘅基本結構。《易經》結構係非常簡單，你只需要記住《易經》之中有兩種力量，一種係陽，另一種係陰，佢哋就叫做兩儀。咁我哋先解釋一下陰陽係咩意思。陽主要係指動力（剛性力），陰主要指承載力（柔性力），用一個比喻解釋就係陽就好似電力一樣，可以喺空氣中隨意散發，但佢聚合唔到，而陰就好似電池咁，可以將電力聚合喺電池入面咁，電池如果無電力，都無作用，所以電力同電池一定要組合作用，先可以運轉，呢個就係「剛柔相推而生變化」；但呢個比喻有個唔好處，就係《易經》好可能唔會承認陰／陽可以獨立存在，而電力同電池聽落都可以獨立存在，另外，電池聽落係有固定嘅形狀，但其實陰無一個固定嘅form，但勉強用住呢個簡單嘅比喻再加以上嘅澄清去形象咁解釋咗陰陽先。用另一個比喻去講，陽就好似有隻有意志嘅手，陰就好似一舊泥膠，泥膠本來無咩規則、形狀，但有意志嘅手可以將泥膠搓成石頭、樹木、牛馬、人類，所以萬事萬物都係陰陽合作、互動嘅結果。可見，《易經》強調當陰同陽一齊發揮作用，就可以變化出萬事萬物；陽係萬事萬物嘅動力來源，而陰就給予萬事萬物存在嘅基礎。
喺《易經》當中，陽用一條橫線表示，好似一字咁，陰用一條中間斷開嘅橫線表示，好似斷開嘅一字咁，用形象嚟講，你都可以想像陽係一個男仔，陰係一個女仔。咁陰陽點嚟？同萬物又有咩關係？
易有太極，是生兩儀
胡適以《說文解字》話「極，棟也」解釋「易有太極」，棟即係屋頂上嘅橫樑，太極既然係橫樑，咪即係陽嗰一條橫線，所以太極係指陽，由陽生出兩儀（即係陰陽）。
但呢個講法意味住陽生出陰陽，即係a生出ab，咁就有兩個問題，如果ab係相等於a（小明加小美等於小明），咁即係要點理解呢？如果ab唔相等於a，咁點解a要生出多個b出嚟呢？另外，陽生出陰陽，涵含住陰係嚟自於陽嘅意思，呢點就未必受到廣泛嘅支持。因為成本《易經》連同《十翼》只出現過一次太極，但係以「陰陽」並稱五次，兩者關係平等，當中又指「陰陽之義配日月」《易・繫辭上》，陰就好似月一樣，陽就好似日（太陽）一樣，而《易・文言》講到「與日月合其明」，日同月合埋就係明，即係a+b=c，所以個太極應該係陰同陽嘅混合，強行要畀個名嘅話，可以叫佢做道，亦即係「一陰一陽之謂道」，道就係陰陽嘅整體，用圖象嚟講，道就係太極圖，黑代表陰，白色代表陽，所以《易經》嘅生字，往往唔係解由無到有嘅創生，而係一種變化，太極唔係由無到有嘅創生陰陽，而係變化、轉化成陰陽｛新儒家會話有道德嘅創造，有機會再解釋畀大家聽｝。而我認為呢度胡適太輕易以《說文解字》去解釋太極呢個概念。
兩儀生四象，四象生八卦
我哋依家知道道（太極）生出陰陽，咁陰陽生出四象又係咩意思呢？簡單嚟講你可以想像有上下兩個位，由下至上咁排列（記住！《易經》係由下面睇上去），每一個位都叫做一個爻，由於只有兩種力量，所以每一個爻唔係陰就係陽，所以每一個位唔係一條橫線（陽），就係一條斷開嘅橫線（陰）。你可以想像有打直有一條隊，可以畀兩個人去排，兩個位，畀兩個性別去排，咁就有四個可能性，女男、男男、男女、女女，佢哋分別象徵少陽、老陽、少陰、老陰，依次係表示春夏秋冬、東南西北，木火金水，又以青龍、朱雀、白虎、玄武象徵。呢個就係四象。我哋可以見到古人透過賦予簡單嘅橫線陰同陽嘅意思，然後得出唔同嘅象徵，呢個就係古人嘅想像力，我哋會見到呢個象徵會變得越嚟越多樣。
呢度先同大家分享一個fun fact。問你一個問題，點解「東西」嘅意思係「嘢」，即係意指所有嘢？飯係東西、足球又係東西、太空船都係東西。其實就係嚟自《易經》，春夏秋冬、東南西北，東對應春天，西對應秋天，對古代農民嚟講，春天播種、秋天收成，就係佢所能夠擁有嘅所有嘢，所以東西就可以意指everything。其實仲有兩個可能嘅解釋，就係東係木、西係金，木係自然物（植物），金係人造物（器具），自然物同人造物加埋就係所有嘢。另一個解釋係木火金水之中，只有木同金係有形，所以就用呢兩樣有形嘅物嚟指代所有嘅嘢。三個解釋，各自有其道理。
講返《易經》，道生陰陽，陰陽生四方四時，即係四象，四象又會生八卦。所謂嘅「八卦」入面個「卦」係講緊有三個位置，都係由下至上咁排列，所以可以想像有一條隊，今次可以畀三個人去排隊，呢三個位置就可以有唔同嘅排序，有時係男女男、有時係女女男、有時係男男男……總之三個位畀兩個性別排，最終就會有八個可能性，呢個就係八卦。然後呢八個卦又可以變出上面有其中一個八卦、下面又有其中一個八卦，即係呢個三個人嘅隊列又可以再同一個三個人嘅隊列組合，換言之，就係六個位畀兩個性別排，咁就有六十四個可能性，亦即係六十四卦。而呢六十四卦因為每個卦都有六個位，即係六個爻，咁總共就有三百八十四個爻。古人相信，呢三百八十四個爻就可以代表世間嘅一切變化，所以你占完卦得到一個爻，就可以知道你嘅處境。八卦、六十四卦同三百八十四個爻，當中嘅象同辭嘅意思，我哋就下一個部分再講。
如果你數學唔太好，唔理解點解可以二變四、四變八、八變六十四、六十四變三百八十四，可以搵身邊數學叻嘅人解釋畀你聽。同時亦都唔需要氣餒，因為西方哲學家暨數學家萊布尼茨（佢同牛頓差唔多同時期創造出微積分），被《易經》啟發而發現二進制有「極大用途」，發表咗《論只使用符號0和1的二進制算術，兼論其用途及它賦予伏羲所使用的古老圖形的意義》，可見《易經》都真係有數學成份。當然，中國古人就主要將呢個數學發揮落術數之上。
三易——河流
胡適認為，呢一個「易有太極，是生兩儀，兩儀生四象，四象生八卦」嘅過程，顯示住「萬物由極簡易的變為極繁雜的的公式。」（本書，頁八零）呢點我認同，所以易字除咗有變化嘅意思，仲有簡單嘅意思，即使有三百八十四爻，睇落好複離，但個爻都一定係陰或者陽，呢個就係《易經》嘅簡易之處，同時有不易之處，即係唔會改變嘅地方，萬事萬物都一定係陰陽聚化而成。呢個就係《易經》三易嘅意思，變易，簡易，不易。如果對應胡適用河流解釋，就係河流每刻都變緊，咁就係變易；但不變嘅地方係當中嘅水點變都好，呢條仍然係河流，咁就係不易；河流嘅組成好簡單，就係時空同水，咁就係簡易。
而正正係呢一種由簡單變複雜，而萬事萬物嘅根源都係同樣源自於道嘅諗法，所以《易經》先可以透過依家／過去，推算未來，呢咁就係「夫易，彰往而察來」嘅意思，因為世間嘅變化，就好似一條前後不斷嘅直線，由前段推出後段、前因推到後果，咁就有所謂占卜嘅效果。當子張問「十世可知也？」孔子話：「其或繼周者，雖百世可知也。」之所以可以知百世，就正正因為呢種由簡變繁嘅線性理解。
另外，補充一點。儒家因此有一個基礎去講人同人之間可以連結。既然人人都係源自於道，咁人類就能夠共同分享道給予人嘅特性，即係仁心，甚至講到「萬物與我同體」，宋儒喺呢方面就有唔少嘅引伸，所以唔知道《易經》點運作嘅話，要明宋儒講咩就會好難。
結語一
既然世界係由簡易變得複雜，咁我哋就要知幾，幾嘅意思，係一開始嘅嗰一個時刻。《易經》將事物嘅發展都以始、壯、究去理解，你可以想像你要拋一條拋物線，例如拋一個粒石頭咁，你用力一拋，呢粒石頭會有一個開始飛行嘅路線，佢嘅起點就係始，而當粒石頭一離開你隻手，咁嗰一個時刻就叫做幾，而當呢粒石頭去到佢飛行路線嘅最高點，咁就係壯，maximum嘅意思，去到呢粒石頭靜止、唔再飛行嘅時候，就係究，完結嘅意思。既然係咁，只要一個人了解「幾」嘅時刻，就能夠預計到呢粒石頭嘅壯同究會喺咩時間同位置發生，就好似數學題，你見到一條方程式，只需要知道個x／y個數值係幾多，咁成條數就迎刃而解。
《繫辭下》寫到：「幾者動之微，吉凶之先見者也，君子見幾而作，不俟終日。」
所以孔子就極度著緊喺每一件事嘅根源。當佢去思索點解眼前嘅世界充滿住戰亂嘅時候，佢去觀察個幾，得出咗一個答案，就係呢個世界唔係有實無名，就係有名無實。有實無名即係有能力嘅人無相應嘅官職，有名無實即係有官職嘅人無相應嘅能力，有呢個有實無名／有名無實嘅幾，就自然有混亂嘅結果。既然係咁，要改變依家嘅混況，就一定要由名同實嘅對應開始，呢一個就係孔子正名主義嘅開始，要去達到名正言順，首先就要先定義一個有名有實嘅模範。呢點，其實同墨子嘅實用主義好似。
胡適認為，孔子由三易感悟要知幾，以《易經》嘅象同辭去得出模仿上天嘅模範。呢度我哋簡介咗《易經》嘅系統，下一個部分我哋會睇睇胡適對《易傳》嘅特別理解，一個象字可以分出現象、意象、法象，辭去講吉凶，原來同道德判斷有關。
牛哥講經 